Larunbata, 2015eko otsailak 28a.
Erreportajea.
Xakea.
Xakea adimena indartzeko.
Euskal Herriko
hainbat ikastetxetan, xakea da eskolaz kanpo egiten duten kiroletako bat.
Donostiako Zurriola ikastolan, 150 haur baino gehiago aritzen dira, Iņigo
Argandoņa xake jokalaria irakasle dutela.
Testua: Araitz Muguruza.
Arbelaren gainean xake taula erraldoi bat daukate
Zurriolako ikastolan. Pieza handiak ditu, eta, azpian duten imanaren
indarragatik, ez dira lurrera erortzen. Ikasleen atentzioa bereganatu, eta hasi
da azalpenak ematen Iņigo Argandoņa: 1858ko xake partida bat azalduko dizuet.
Parisko opera batean jokatu zuten.... Ikasleak zur eta lur geratu dira, duela
150 urte ere xakea jokatzen zen! Argandoņak erantzun dio haurren harridurari:
Futbola baino askoz ere lehenago sortu zen xakea, duela 2.000 urte ere
jokatzen zuten.
Estrategiak erakusteko erabiltzen dute, gehienbat,
arbeleko taula. Horietako batzuk ikasiak dituzte, dagoeneko. June Torres eta
Leire Sanchezek, adibidez, ispiluaren teknika egin berri zuten MANTANGORRIk
bisita egin zienean. Partidaren hasieran erabili behar da teknika hori; gero
ez du balio horrenbeste, adierazi du Torresek. Xakean jokatzen hasi zirenetik,
teknika ugari ikasi dituzte. Lehen Hezkuntzako lehenengo mailatik seigarrenera
arte ematen dute xakea Zurriola ikastolan. Eskolaz kanpoko jarduera da, eta
bazkaldu aurretik edo ondoren izaten dituzte klaseak. Argandoņak dioenez,
xakeak badu arrakasta ikastolan. 150 ume baino gehiago aritzen dira.
Gauza askotarako zaie lagungarri xakea. Kontzentrazioa,
logika et erabakiak hartzen ikasten dute. Eta, Lehen Hezkuntzako aurreneko
urteetan, hori benetan garrantzitsua da, Argandoņaren iritziz. Urte horietan
ikasten dute irakurtzen eta idazten. Xakearekin logika asko lantzen dute, eta
hori onuragarria izaten zaie. LH3 eta LH4ko ikasleen gelan izan da
MANTANGORRI, eta gehienak, lehenengo mailan hasi ziren jokatzen. Jolasten ari
direnean, isil-isilik aritzen dira. Hala dago Ibai Aranburu. Serio-serio ari
zen lanean galderak erantzuten dituen bitartean. Ongi pentsatzea benetan
garrantzitsua da, jokaldi egokien bidez irabaziko dugulako partida, esan du
piezak lekuz aldatzen ari zen bitartean. Aranbururen aurkaria, berriz, zintzo ari
da haren mugimenduei kasu egiten. Apurka-apurka, hasieran lerrokatuta zeuden 32
piezak taulan zabaltzen ari dira. Haizea Gaskuek ere gustura asko jokatzen ditu
partidak. Esan du behar bezala jokatzeko irakaslearen azalpenei adi-adi kasu
egin behar zaiela.
Ez dira erabaki hutsalak izaten, mugimendu bat edo beste
egiteak ondorio batzuk ekartzen ditu. Horregatik, bizitzarako asko balio duela
dio Argandoņak. Jarrera aldaketak ere eragin ditzake xakeak. Xake irakasleak,
hala ere, ez du uste beti horrela izaten denik. Nik ikusi dut haur batzuei
nola lagundu dien ikasteko jarrera aldatzen. Beste batzuei, berriz, ez
horrenbeste. Ezin da zehatz-mehatz jakin. Argi dago, behintzat, kalterik ez
duela egiten.
Intuizioa da lantzen dituzten beste balioetako bat. Jokalariak
aurkariaren asmoak iragarri behar ditu. Aurreikusi, eta ekidin egin behar ditu.
Argandoņak dio, 10-11 urterekin hasten direla intuizioa lantzen, oinarrizko
ezagutzak landuta dituztenean.
Bereizkeriarik
gabeko kirola.
Baina ikasketa prozesurako bakarrik ez, xakeak baditu
beste hainbat balio ere, gizarteratzeko baliagarri direnak. Ez du genero
bereizkeriarik, esaterako. Eliteko txapelketetan ere emakumeek eta gizonek
elkarren aurka jokatzen dute, hau da, lehiaketak ez dira generoaren arabera
banatzen. Adinaren arabera ere ez dago banaketarik, ez eta pertsonen
gaitasunen arabera ere. Ezintasun fisikoren bat dutenek ere joka baitezakete.
Beti egon izan dira jokalari itsuak; istripu baten ondorioz elbarri geratu
direnek ere joka dezakete. Egia esateko, edonor aritu daiteke.
Zurriola ikastolako haurrek parte hartzen dute
txapelketetan. Ostiralero egiten dituzte Carmelo Balda frontoian. Aranburu,
Torres eta Sanchez joan izan dira. Xakean jarduten duten beste ikastetxeetako
lagunen aurka jokatzen dute. Izan ere, ikastetxe askotan lantzen dute xakea.
Eskolaz kanpoko jarduera moduan jarduten dute xakean. Badaude, ordea, ikasgai
gisa dutenak. Sobiet Batasunako kide izan ziren herrialde batzuetan, hain zuzen
ere. Nazioarteko lehiaketetan nabaritzen da jokalari horien maila.
Kontzentrazioa beharrezkoa da xakean ongi jokatzeko;
norberak bere mugimenduak ez ezik, aurkariarenak ere aurreikusi behar ditu.